2Th 3 | JAE | STEP | O lasitêwaac, jasôm teŋ êwiŋ gebe ateŋ mec êtu aêacŋa gebe Apômtaunê biŋ êIêti ênam gamêŋ auc êna e ŋamalac tetoc mêtê sa amboac amac agôm.

2 Thessalonians 3

Ateŋ mec êtu aêacŋa

1 O lasitêwaac, jasôm teŋ êwiŋ gebe ateŋ mec êtu aêacŋa gebe Apômtaunê biŋ êIêti ênam gamêŋ auc êna e ŋamalac tetoc mêtê sa amboac amac agôm. 2 Ma ateŋ gebe Anôtô ênam aêac sa aŋga lau sec to alôb-alôb nêŋ gebe lau taêsam sêmoa, taŋ sêkêŋ gêwiŋ ŋawae ŋajam atom.

3 Mago Apômtau eŋ ŋac ŋaŋêŋ. Eŋ oc êpuc amac tôŋ ma ejop amac êtu ŋac sec tauŋa. 4 Apômtau kêkêŋ aêac akêŋ gêwiŋ gebe biŋ, taŋ asôm gêdêŋ amac naŋ, amac amasaŋ su ma oc amansaŋ. 5 Apômtau tau ênam gôliŋ amacnêm ŋalêlôm gebe têmtac êwiŋ Anôtô ma aôc gêŋwapac totêmtac êpa sugeŋ atôm Kilisi tau.

Aêac samob tanam kôm tanac ŋawaegeŋ

6 O lasitewaac, aêac ajac biŋsu amac ajam aêacnêŋ Apômtau Jesu Kilisi laŋô, gebe aŋgamiŋ taôm êndêŋ lasitêwai, taŋ sêsa nêŋ lêŋ salaŋ to sêbu biŋsu, taŋ aêac akêŋ gêdêŋ êsêac naŋ. 7 Taôm ajalagac gebe atêku aêac, ec ŋajam, gebe gêdêŋ taŋ aêac amoa awiŋ amac naŋ, asa ma lêŋ salêŋ atom. 8 Aêac aeŋ amacnêm ŋac teŋ nê mo teŋ ŋaôma atom. Aêac ajam ma koleŋ e tekweŋ gêbac kêtôm bêc to geleŋgeŋ, gebe amacnêm teŋ im têkwa su ŋaômageŋ êtu aêacŋa atom. 9 Aêac atôm gebe ajatu gêŋ taniŋŋa aŋga amacnêm, mago agôm atom, abe akêŋ ŋadôŋdôŋ êndêŋ amac gebe atêku aêacŋa. 10 Gêdêŋ taŋ aêac amoa awiŋ amac naŋ, asôm biŋ tonec gêdêŋ amac su gebe “Ŋac teŋ embe endec kôm, naŋ êniŋ gêŋ atom.” 11 Aêac ato biŋ tonaŋ gebe aŋô ŋawae gebe nêm lau ŋagêdô sêsa nêŋ lêŋ salêŋ. Êsêac sêjam kôm atom, sêgôm gêŋ sêbôcgeŋ. 12 Aêac anac biŋsu lau amboac tonaŋ to alêŋ biŋ êsêac êtu Apômtau Jesu Kilisiŋa gebe sênam nêŋ kôm êtu katô, ec sêniŋ tauŋ nêŋ ŋêŋgeŋ.

13 O lasitêwaac, ôlim ŋakam êsa êtu aŋgôm gêŋ ŋajamŋa atom. 14 Ŋac teŋ embe taŋa wamu aêacma biŋ, taŋ ato kêsêp papia tonec naŋ atom, naŋ taêm ênam ênê biŋ ma êŋgamiŋ taôm êndêŋ eŋ gebe maja tau. 15 Mago alic eŋ amboac nêm ŋacjo atom, anêc biŋsu eŋ amboac lasimi teŋ.

Paulu gêjac mata nê papia

16 Ma biŋmalô Ŋatau tau êkêŋ biŋmalô êndêŋ amac êtôm têm samob ŋalêŋ tokaiŋ-tokaiŋ. Apômtau êwiŋ amac samob.

17 Aê, Paulu tauc, lemoc kato biŋ aoc gêjac amacŋa tonec. Ŋoc papia tonec taujala. Aê kato amboac tonecgeŋ. 18 Aêacnêŋ Apômtau Jesu Kilisi nê moasin êndêŋ amac samob êwac.